Основниот дел од сезоната во НБА лигата полека се ближи до самата завршница. Членовите на Источната конференција треба да одиграат уште по еден натпревар и познати се сите учесниците во разигрувањето за шампионската титула, а на Западот Далас остана без место во постсезоната.
Маверикс загубија на домашен паркет со 112-115 од Чикаго и оваа сезона нема да играат плејоф, една година откако беа во конференциското финале. Тимот свесно ги остави надвор од тимот Кајри Ирвинг, како и четворица други важни играчи, а Лука Дончиќ беше лимитиран на само една четвртина. Овој пораз на Далас значеше дека Оклахома го освојува 10.место на Западот и ќе игра во плеј-ин турнирот.
Бруклин го совлада Орландо со 101:84 и дефинитивно го обезбеди местото меѓу шесте најдобри и пласманот во плеј офот.
Микал Бриџис мечот го заврши со 22 поени и пет скока, Камерон Џонсон беше стрелец на 18 поени додека Ник Клекстон забележа 14 поени и 15 освоени топки под обрачите.
Во поразениот тим Кол Ентони впиша 14 поени и девет скока, а Гога Битадзе додаде 12 поени и 15 освоени топки.
Лос Анџелес Лејкерс славеше над Феникс со 121:107 и се уште има надеж дека може да го избегне учеството во плеј инот.
Д’Анџело Расел беше стрелец на 24 поени, Остин Ривс имаше учинок од 22 поени и пет додавања, а ЛеБрон Џејмс стигна до 16 поени и шест асистенции.
На спротивната страна најефикасен со 18 поени беше Тори Крег, а Џош Окоги имаше 16 поени и шест скока.
Во првиот круг од плеј ин на Истокот ќе се соочат Мајами – Атланта и Торонто – Чикаго, а во првата рунда од разигрувањето Милвоки и Бостон го чекаат епилогот од оваа фаза на лигата додека останатите четвртфинални двојки се Кливленд – Њујорк и Филаделфија – Бруклин.
Во останатите натпревари постигнати се следниве резултати: Шарлот – Хјустон 109:112, Индијана – Детроит 115:122, Вашингтон – Мајами 114:108, Атланта – Филаделфија 131:136, Бостон – Торонто 121:102, Милвоки – Мемфис 114:137, Њу Орлеанс – Њујорк 113:105, Сакраменто – Голден Стејт 97:119.
ФОТО: Игор Паневски