МЗТ Скопје продолжува да сонува опстанок во АБА-лигата во самиот финиш од сезоната откако вечерва запиша победа од 74-77 на гостувањето кај Сплит во рамки на претпоследното коло. Сега „металците“ чекаат услуга од Црвена Звезда за да ги продолжат шансите за опстанок во елитата до последниот натпревар.
Македонскиот шампион го почна натпреварот со одлична игра, но до крајот на првиот период Сплит го презема водството со 24-20. МЗТ одигра одлична втора четвртина кога го лимитираше хрватскиот тим на само 9 постигнати поени и на пауза замина со водство од 31-39. Во второто полувреме домашните иако силно притискаа, „металците“ не попуштија и го држеа водството, кое стигна и до највисоки +12 во последниот период. Сплит успеа да дојде до -3 во самиот финиш, но Мајкл Кефи постигна важна тројка со која ја обезбеди победата. Конечниот резултат гласеше 74-77.
Браќата Стојановски одиграа одличен натпревар, а Војдан постигна 16 поени, додека Дамјан имаше 13. Двоцифрени во нападот беа Александар Бурсач со 12 и Мајкл Кефи со 10 поени.
МЗТ сега чека пораз на Борац Чачак пред своите гледачи од Црвена Ѕвезда, натпревар што се игра во недела. Ако фаворитот од Белград слави, тогаш во последното коло МЗТ на домашен терен треба да ја победи Цибона идниот петок, а Борац уште еднаш да загуби и тоа на гостувањето кај фаворитот Будуќност.