Александар Чеферин и во следните четири години ќе биде на чело на Европската фудбалска асоцијација.
Педесет и пет годишниот Словенец беше единствениот кандидат на конгресот на УЕФА што се одржува во Лисабон.
За Чеферин ова ќе биде трет и последен мандат во кој ќе може да ги продолжи двата големи проекти кои ги почна во последниве неколку години.
Станува збор за реформата на финансискиот фер плеј со која ќе се воведат горни граници на платите на играчите, обештетувањата за трансфери и провизијата на менаџерите како и примена на новиот формат во Лигата на шампионите кој ќе стапи на сила од сезоната 2024/2025 со кој ќе зголеми бројот на учесници од 32 на 36 клуба.
Со најавата за измена на системот на натпреварување во шампионската лига се зголеми и приходот од продажбата на телевизиските права кој за периодот од 2024 до 2027 година треба да донесе рекордна сума од 15 милијарди евра.
Тој неодамна најави и можност за ревизија на правилото за делумна сопственост на клубовите со кое им се забранува на инвеститорите да поседуваат повеќе тимови кои учествуваат во едно натпреварување.
Чеферин на чело на УЕФА дојде во 2016 година кога го замени тогаш суспендираниот Мишел Платини.
ФОТО: Игор Паневски