Брендан Роџерс повеќе не е менаџеро на Лестер сити откако спогодбено го раскина договорот со премиерлигашот по серијата лоши резултати. „Лисиците“ наскоро ќе го објават името на новиот кормилар, кој ќе го води тимот во борбата за опстанок на последните 10 натпревари од сезоната.
Лестер вчера загуби од Кристал Палас со 2-1 во Премиерлигата, што за тимот беше петти пораз на последните шест натпревари. Тоа значеше пад во зоната за испаѓање во Премиерлигата. Челниците на клубот решија дека е време за промена на клупата и спогодбено го раскинаа договорот со Роџерс, кој го водеше тимот четири сезони. Негов најголем успех беше освојувањето на ФА Купот во 2021 година, а го водеше клубот на вкупно 204 натпревари од кои оствари 92 победи. Роџерс е вкупно 12-тата менаџерска смена сезонава во Премиерлигата.