Според извештајот на Фудбалската асоцијација клубовите членови на Премиер лигата во периодот од 1 февруари 2022 до 31 јануари 2023 година на менаџерите на фудбалерите им исплатиле провизии во висина од 318,2 милиони фунти.
Најголема сума исплатил Манчестер Сити и тоа 51,56 милиони, а најголем процент отпаѓа на провизијата за трансферот на Ерлинг Халанд.
Челзи во овој период ангажирал дури 15 фудбалери, а за услугите на менаџерите исплатил 43,16 милиони фунти додека трет со сума од 33,69 милиони е Ливерпул.
Меѓу првите пет со исплатени најголеми суми се уште Манчестер Јунајтед со 24,7 милиони и Арсенал со 16,7.
Од сите членови во Премиер лигата најмала сума има исплатено Нотингем Форест иако во овој период има реализирано најголем број на трансфери, а клубот тоа го чинело 4,3 милиони фунти.
Според правилата на ФИФА секоја национална асоцијација од 2015 година мора јавно да ги објави сумите кои им се исплаќаат на менаџерите на фудбалерите, а во првата година од примената клубовите во Англија исплатиле сума од 47 милиони фунти.
ФОТО: Игор Паневски