Првиот човек на ФИФА, Џани Инфантино и претседателот на асоцијацијата на европските клубови, Насер ал Келаифи денеска потпишаа меморандум за стратешка соработка.
Меморандумот кој е потпишан во Будимпешта ќе важи до 31 декември 2030 година, а примарна цел е заштита на клупскиот и репрезентативниот фудбал.
ECA и ФИФА се договорија во иднина календарот на репрезентативните активности да се прилагоди со клупските натпреварувања, а се со цел да нема поголеми оптоварувања за играчите, но и да не се занемарат клупските активности.
Асоцијацијата потврди дека ја поддржува идејата за одржување на Светското клупско првенство кое треба да почне од 2025 година како и натпревар во кој ќе се сретнат победникот во Лигата на шампионите и првакот на интерконтиненталните натпреварувања.
ФИФА најави дека во иднина ќе го зголеми и буџетот за компензација на клубовите кои имаат свои играчи на Светските шампионати и во периодот од 2026 до 2030 наместо досегашните 209 милиони ќе се исплаќаат 355 милиони долари.
ФОТО: Игор Паневски