Контролниот дуел против Фарските острови е следен предизвик за репрезентацијата на Македонија. Гостинскиот селектор Хакан Ериксон истакна Македонија е вистинскиот противник за неговиот тим во пресрет на продолжението на квалификациите за континенталното првенство.
“Утрешниот натпревар е одлична шанса да се обидеме да подобриме некои работи во нашата игра. Сигурно дека ќе има измени во однос на последниот натпревар со Молдавија. Многу од играчите се преморени од тој дуел бидејќи домашното првенство само што почна. За мене е добро што ќе можат да користам повеќе фудбалери и да ги проверам нивните можности во пресрет на следните натпревари”, рече селекторот на гостите Хакан Ериксон.
Предводникот на Фарските Острови имаше само пофални зборови за репрезентацијата на Македонија и потенцираше дека е слична на некои противници во квалификациите за Европското првенство.
“Македонија е силен тим, тука некаде е според квалитетот на Полска и Чешка, ќе пробам некои опции за време на натпреварот за да имам појасна слика за тоа што не очекува во следниов период. Се надевам дека и мојот колега Милевски ќе го направи истото бидејќи и Македонија ја очекуваат нови предизвици во квалификациите. Имам полн респект кон Македонија за она што го направи во квалификациите за Светското првенство, но и за прикажаното во Лигата на нации каде резултатите не беа приближни на прикажаните игри”, заврши селекторот на Фарските острови.
ФОТО: Игор Паневски