Еурофарм Пелистер загуби на гостувањето кај Скандерборг Орхус со 24-22 во рамки на 7.коло во Европската лига на ЕХФ. За битолчани ова беше четврти пораз во второто по ранг клупско натпреварување сезонава, но и натаму остануваат во игра за пласман во нокаут фазата, каде од оваа група Д веќе се пласираа Фуксе Берлин и Орхус.
Пелистер одигра натпревар со две различни полувремиња. Во првиот дел, имаше водство во најголем дел. Одбраната функционираше перфектно заедно со голманот Урбан Лесјак, кој имаше 10 интервенции, а на паузата резултатот гласеше 11-11. Нашиот вицепрвак очајно го отвори второто полувреме, кога во првите 15 минути му дозволи на противникот да направи серија од 10-2 за да дојде до убедливо водство од 8 голови разлика.
Битолчани силно притиснаа во финишот и го завршија натпреварот со серија од 4-0, а да не беше расположениот голман Бутаф, можеа да ги направат последните минути многу подраматични. На крајот Еурофарм Пелистер го запиша четвртиот пораз во групата овој пат со 24-22.
Мирко Радовиќ и Жарко Пешевски со по четири погодоци беа најефикасни во нашиот тим, додека Лесјак го заврши натпреварот со 12 одбрани, а Марко Кизиќ имаше шест. Кај данскиот тим, најдобар беше Мортен Балинг Кристиансен со девет погодоци, а голманот Салах Бутаф имаше 13 одбрани.
Во следното 8.коло, Пелистер на домашен терен го речекува тимот на Агуаш Санташ на 14 февруари.