Синоќа околу 21:40 во полицијата во Благоевград, Бугарија било пријавено оштетување на стаклото на македонскиот културен центар “Никола Јонков Вапцаров”.
Според бугарските медиуми пред клубот имало повеќе камења со кои бил каменуван клубот, а инцидентот најверојатно се случил околу 21 часот по бугарско време.
Клубот беше отворен во октомври лани кога имаше тензична атмосфера при отварањето. Оттогаш до сега немало сериозни инциденти освен одлепување на една буква од влезниот излог на клубот.
Нападот во Благоевград се совпадна со вчерашното одбележување на 151 година од раѓањето на Гоце Делчев. Во Благоевград вчера беше и контроверзниот бугарски европратеник Ангел Џамбаски кој иако најави не дојде во Скопје, но цело време коментираше од Благоевград за вчерашните настани и застои на границата и за одбележувањето во црквата Свети Спас.