Можност за „ослободување“ на блокираните крстосници низ главниот град и продолжување на протестот на приватните автобуски превозници само пред Град Скопје, најавија тие на денешната прес-конференција на која истакнаа дека формите за идно делување ќе бидат дефинирани на координативниот состанок кој е закажан за сабота.
„Главната вина за оваа ситуација е кај управата на Град Скопје и бесот сè повеќе се насочува во тој правец. Како одминуваат деновите, така сè повеќе излегува на виделина кој е виновен за настанатата ситуација. Оттука и можноста за протестите да бидат само пред Град Скопје“, изјави Кемал Муриќ од „Слобода превоз“.
Приватните превозници веќе четврти ден имаат паркирано десетици автобуси на крстосниците кај „Мавровка“, на булеварот „Илинденска“, на потегот меѓу Владата и Град Скопје, и кај Црвен крст во обид да извршат притисок за наплата на, како што тврдат, долгот од 1,5 милиони евра што Градот го имал кон нив.
„Ние не сме организатори на протестите, не знаеме до кога ќе траат, не знаеме дали ќе се прошират и на други улици и во кој формат ќе се протестира“, порачаа од „Макекспрес превоз“, преку соопштение потпишано од Милорад Димитријевски како сопственик на компанијата.