Германската репрезентативка Алина Гријселс со 29 погодоци е најефикасната ракометарка во досегашниот тек од Европското првенство за ракометарки што се одржува во Македонија, Словенија и Црна Гора.
Гријселс воедно има најдобар учинок според процентот на реализација. На четири натпревари упатила 41 удар или има прецизност од 70,7%.
Втора на листата на стрелците е Словенката, Ана Грос со 25 додека на третото место е Ема Фрилс од Данска со 24 колку што има и Холанѓанката Ангела Малестајн.
Меѓу голманките најдобар учинок има Јара Тен Холте од Холандија која од 120 упатени удари има 38 одбрани или учинок од 31,67%.
Веднаш зад неа е Германката, Катарина Филтер со 36 интервенции или во проценти изразено 31,03, а идентичен број на одбрани има Сандра Тофт од Данска.
По бројот на прецизни додавања води Милена Раичевиќ од Црна Гора со вкупно 30 или 10 по натпревар, а следуваат Норвежанката, Стине Офтедал со 19 и Керсин Киндиг од Швајцарија со 16.
ФОТО: Игор Паневски