Обиди за рекет, изживување и закани со затвор за стопанственици од Карпош, наброи градоначалникот Јакимовски, пред да го прогласи лидерот на опозицијата, Мицкоски, за јавен непријател.
Крајот на коалицијата помеѓу ГРОМ и ВМРО-ДПМНЕ го објави на вонредна прес- конференција, по информациите за жестока седница на Советот на општината, која се одржала претпладне.
Прекинувањето на соработката со најголемата опозициска партија, Јакимовски тврди дека не значи и идна коалиција со владејачката СДСМ.
„Знам дека сега ќе имаме приказни дека Јакимовски ќе оди со СДСМ и така натаму, затоа што кога аргументите ги снемува, тогаш настапуваат инсинуациите. Не правам коалиција и не правиме коалиција со никого“ изјави Стевчо Јакимовски, градоначалник на Општина Карпош.
Јакимовски дури ги повика и институциите да се позанимаваат со заканите и притисоците кои тврди дека доаѓаат од водечките луѓе на сега веќе поранешниот негов коалициски партнер, ВМРО-ДПМНЕ.
„Карпош и јас мораме да им се спротивставиме на опструкциите, мораме да им се спротивставиме на командите од еден центар, мораме да му се спротивставиме на шпицен- градоначалникот. Сметам дека за изживување, господинот Мицкоски треба да побара некој помлад од мене, со поинаков карактер и помалку години зад себе“ изјави Јакимовски.
Советниците од ВМРО-ДПМНЕ веднаш реагираа дека уште од прв ден кога Јакимовски стапи на функцијата градоначалник, се појавиле несогласувања.
Тврдат дека на општината ѝ се заканува сериозна бетонизација и узурпација на преостанатото зеленило, а дека тие се противат и затоа градоначалникот објавил крај на соработката со нивната партија.
„Советниците на ВМРО-ДПМНЕ не одобрија неколку обиди на Јакимовски за вцртување на згради на различни локации низ Карпош, кои освен за интерес на бизнисот, не служат никому. И покрај нашите бројни апели за прекин на бетонизацијата, Јакимовски продолжува со намерите да штанца градежни дозволи“ изјави Роберт Велјановски од советничката група на ВМРО-ДПМНЕ во Општина Карпош.
Јакимовски по четврти пат е на функцијата градоначалник на Карпош, а овојпат во фотелјата седна откако дел од гласовите во опозицискиот блок се прелеаа на негово конто, нешто за што не пропушти да се заблагодари на прес-конференцијата, на која досегашните партнери ги прогласи за непријатели.
Петар Догов