Лидерите на ЕУ во понеделник ќе одржат вонреден самит во Брисел, чија примарна цел ќе биде деблокирање на шестиот пакет санкции за Русија, кој заглави поради противењето на неколку земји од централна и источна Европа. Најзвучна точка од шестиот пакет санкции, секако е комплетната забрана за увоз на руски енергенси во ЕУ, но во исто време е и главната причина за противењето на земји како Унгарија, Чешка и Словачка. Унгарскиот премиер Виктор Орбан, во писмо го предупреди претседателот на ЕС, Шарл Мишел, дека нема намера да разговара за таа тема во понеделник, тврдејќи дека забраната за увоз на руска нафта и гас, ќе биде нуклеарна бомба за унгарската екеономија.
Унгарија нема да гласа за предлогот на Брисел за нафтено ембарго, се додека тоа го прави унгарскиот увоз на енергенси невозможен. Овој проблем беше создаден од Европската комисија, и затоа решението мора да биде понудено од Европската комисија, категоричен беше министерот за надворешни работи на Унгарија, Петер Сијарто.
При воведувањето на претходни пакети земјите членки без поголеми проблеми ги усогласуваа ставовите а ЕК гордо тврдеше дека често критикуваната бавна европска бирократија, беше исклучително брза и ефикасна во воедувањето на санкциите против Русија и одобрувањето на помош за Украина. Фалбите беа основани се до предлагањето на шестиот пакет санкции, а сега, многумина во Брисел ја обвинуваат претседателката на ЕК Урсула фон дер Лајен дека избрзала со предлогот. Украинскиот претседател, Володимир Зеленски, кој од почетокот на војната лобира за запирање на милијардите евра кои секој месец Русија ги заработува од извозот на енергенси во Европа, бара поголема експедитивност од Брисел.
Притисокот врз Русија буквално е спасување животи. И секој ден на одолговлекувања, салбости, разни дебати или предлози да се смири агресорот за сметка на жртвите значи повеќе убиени Украинци. Ова се нови закани за сите на нашиот континент, предупреди Зеленски.
Покрај забраната за увоз на енергенси, во шестиот пакет има повеќе мерки, како проширување на контролата врз увозот на останати производи, дополнително замрзнување на средства и имот, но и санкции насочени кон најголемата руска банка, Сбербанк.
Игор Трајков
