Политичка пресметка. Вака потпретседателот на Собранието, Горан Мисоски од НСДП, ја коментира аудио снимката од која се слуша како човекот кого го заменува во отсуство вика, пцуе и ги навредува собраниските службеници. За Џафери вели дека е најдобриот претседател што Собранието кога било го имало, иако еден период на таа функција беше и се` уште актуелниот претседател на неговата партија, Тито Петковски, за чиј наследник се подготвува.
Осуда или коментар за однесувањето на собранискиот спикер, деновиве немаше ниту од останатите коалициони партнери во власта, вклучително ниту од премиерот, кој е со став дека од снимката не се гледа кој со кого зборува и за него, тоа е доволна причина за да не дава субјективно мислење.
Опозициските партии, кои поведоа постапка во Комисијата за мандатно-имунитетни прашања и предложија пратеници кои се подготвени да сведочат за однесувањето на Џафери, денеска излегоа со нови обвинувања дека намерно не се закажува седницата на комисијата која треба да расправа за аудио снимката.
Пренџов тврди дека, за време на случката, во пленарната сала имало повеќе пратеници од власта и ги охрабрува да посведочат и тие за однесувањето на собранискиот претседател. Од Џафери и неговиот кабинет не ја коментираат иницијативата на опозицијата за дисциплинска постапка против него, која се заснова на кршење на етичкиот кодекс на пратениците. Неколку дена по ред нема збор ниту за аудио снимката.
Далиборка Демјанска Цвтеновска