ДИК констатираше дека на 17-ти април жителите на општината Центар Жупа не успеаја да изберат градоначалник. На гласање излегле недоволни 29,96 одсто од запишаните гласачи, односно, 239 гласачи помалку од потребните. ДИК ќе ја извести Владата дека и овие, повторени избори се неуспешни бидејќи одзивот на гласањето е помал од една третина. На Локалните избори во октомври минатата година, излезноста беше уште помала – 25,77 одсто.
Во трката за градоначалник учествуваа двајца кандидати: Ариан Ибраим од ДПТ и Шаин Шаќир од ДНЕТ.
Центар Жупа е печалбарска општина. Дури 70 одсто од жителите не се во земјава и тоа е причината што не се може да се постигне законскиот цензус од 30 одсто.
И општината Маврово-Ростуше не може да избере градоначалник. На редовните избори во октомври исто така немаше доволен одзив, а изборите закажани за минатата недела беа откажани откако не се пријави ниту еден кандидат, односно – двајцата кандидати од октомвриските избори ги повлекоа своите кандидатури.
Соња Николовска