За 4 час низ цела држава, сообраќајните полицајци сопреле 576 автобуси и комбиња за превоз на патници, 11% од нив имале неостатоци и неисправности што биле откриени на технички преглед.
МВР ја нарече акцијата “Дозвола” и соопшти дека најмногу неисправни превозни возила открила во тетовско и штипско.
Почестите контроли почнаа по трагедијата на Беса Турс во Бугарија кога загинаа 45 патници, а проверките покажаа огромен број на пропусти кои надлежните ги толерирале. Никој досега не е казнет ниту обвинет поради сопствените пропусти.
Во денешното соопштение МВР соопшти дека 42 возила за превоз на патници имале неисправни сопирачки:
Денеска (20.01.2022) во периодот од 08.00 до 12.00 часот Министерството за внатрешни работи во рамки на оперативната акција „Дозвола“ спроведе зајакната акциска контрола на територијата на Република Северна Македонија на возила со кои се врши јавен превоз на патници, соопшти денеска портпаролот на МВР Тони Ангеловски.
„Контролирани се 576 автобуси и други возила со кои се врши јавен превоз, а неисправност е утврдена кај 60 возила. Од нив 21 на територија на СВР Тетово, 11 на територија на СВР Штип, девет на територија на СВР Струмица, осум на територија на СВР Скопје… Од овие 60 возила, кај 42 е утврден неисправен уред за запирање, кај пет неисправен уред за управување… Возилата се исклучени од сообраќај и ќе следуваат соодветни поднесоци“, рече Ангеловски
Од страна на инспектори на Државен инспекторат за патен сообраќај и инспектори од единиците на локална самоуправа ( кои исто така учествуваа во акциската контрола) преземени се 18 мерки поради вршење на јавен превоз без лиценца.
„Засилените акциски контроли продолжуваат и во наредните денови. Апелираме до сите учесници во сообраќајот да ги почитуваат сообраќајните правила и прописи и заеднички да придонесеме за побезбедни патишта“, рече Ангеловски.