Светската здравствена организација (СЗО) издаде предупредување пред Божиќните празници поради забрзаното ширење на омикронската варијанта на коронавирусот.
„Подобро е да се откажат собири отколку живот“, рече генералниот директор на СЗО Тедрос Аданом Гебрејесус на прес-конференција, додавајќи дека „треба да се донесат тешки одлуки“.
„Во некои случаи, тоа ќе значи откажување или одложување собири и настани“, рече тој.
„Сите ни е преку глава од оваа пандемија. Сите сакаме да поминуваме време со пријателите и семејството. Сите сакаме да се вратиме во нормалниот живот“, додаде Тедрос.
Тедрос додаде дека пандемијата може да заврши оваа година доколку 70 отсто од населението во секоја земја во светот се вакцинира до средината на годината.
Изјавата на лидерите на СЗО доаѓа во време кога здравствените експерти тврдат дека омикронот стана доминантен меѓу новите случаи на инфекција во Соединетите држави.
„Сега има силни докази дека омикрон се шири значително побрзо од варијантата делта. И има поголеми шанси за инфекција или повторна инфекција на луѓето кои биле вакцинирани и оние кои оздравеле од коронавирусот“, рече Гебрејесус.
Голем број земји, вклучително и Франција и Германија, ги зајакнаа ограничувањата и воведоа ограничувања за патување во обид да го забават ширењето на новата варијанта. Холандија воведе строга блокада што ќе трае за време на божиќните празници.