Делницата на патот каде што се случи трагедијата со македонскиот автобус има недостатоци и свои маани, но тие не се директен причинител на несреќата. Огромниот број на жртви е последица на пожарот којшто настанал. Ова се заклучоците од увидот којшто во изминатите денови го правеа бугарските власти. Ја проверуваа целосната документација за делницата помеѓу местата Драгичево и Горна Дикања. Според документите, во 2002 година е издадена градежна дозвола и е одобрен проектот за изградба на патот. Од 2006 година има дозвола и за изградба на дополнителни клучки. Тогашното ограничување на брзината е 90 километри на час. Во 2013 година дозволената брзина веќе била зголемена на 120 километри на час.
Не можеме да тврдиме дека зголемувањето на максималната брзина од 120 километри на час е главната причина за несреќата. Грубоста на површината на патот е во прилично добра состојба. Во однос на заштитната ограда наречена „рибна опашка“ истата ги исполнува стандардите. Наводно, несреќата не настанала со голема брзина, но избувнал пожар. Имаме многу чуден настан – пожар, што мислам дека е главната причина за жртвите. Немаме објаснување како точно изгоре овој автобус, изјави Виолета Комтова, министерка а регионален развој и јавни работи.
Според, архитектот Калинов, при промената на ограничувањето на брзината, сменети се само ознаките и патната сигнализација. Сепак патот останува таков каков што е, со кривините кои не се за возење со толкава брзина.
Она што не загрижува е што и во самиот проект попречните свртувања на коловозот се нешто над 4%, што значи дека брзината треба да биде 90 километри. При поголеми брзини возилата скршнуваат налево, а во случај на незгода, автобусот тргнал десно, што е предуслов да се претпостави дека се движел со мала брзина, вели архитектот Влади Калинов.
И покрај тоа што бугарските власти децидно тврдат дека брзината не е причина за несреќата, министерката за регионален развој и јавни работи Виолета Комитова најави краткорочна мерка, а тоа е да ја замени ознаката и да ја намали максималната брзина на 90 километри на час за таа кобна делница каде што животот го загубија 45 македонски државјани.
Петар Догов