Бура од реакции од добитниците на наградата „ 13 Ноември“ и од комисијата која решаваше за наградените, по синоќешното отсуство на новата градоначалничка на Град Скопје од свечениот чин на врачувањето , во салонот на Филхармонијата. Според членови од комисијата отсуството на Данела Арсовска е негативна реакција и некомплетен протоколот за врачување на наградата, кој подразбира секогаш до претседателот на Одборот за доделување на наградата „13 Ноември “, да стои градоначалникот, кој ја врачува наградата.
Значи цело е кога има се, нели? Нормално, врвот во моментот на Град Скопје е таа. И ако не се појави веднаш, не е тоа, тоа. Глупаво е. Наградата не губи, не би се изразила дека е девалвирана. Но, самиот тој протокол, самото доделување на самата награда би било комплетно, ако е таму градоначалничката. Нормално, како реакција е негативна, изјави Даница Стојанова –член на Комисијата именувана од Одборот за наградата „ 13 Ноември“
Од Институтот за македонска литература кои се едни од добитниците на наградата „ 13 Ноември“, велат дека непојавувањето на градоналаничката Арсовска на врачувањето на наградите било забележано од присутните и дека е пропуштена можност за неа во репрезентативна смисла да се покаже како прв човек на Град Скопје.
Штета е затоа што во тој чин колку што ние се иницираме во улогата на наградени и од тогаш ја носиме таа чест, исто толку и за тој што ја извршува честа и тој ја исполнува таа улога. Се иницира во улогата на некој кој ја има моќта да го изврши тој чин.Во таа смисла, тоа е навистина штета затоа што е пропуштена можноста да се запоседне улогата во една најубава репрезентативна смисла , на прв човек на Градот, рече Наташа Аврамовска- директорка на Институтот за македонска литература
Од Град Скопје , отсуството на градоначалничката од свеченоста го објаснуваат со завршената постапка за доделување на наградите за време на нејзиниот претходник, Шилегов.
Наградата „13 Ноември“ , е највисоко признание што на заслужни граѓани и правни субјекти во повеќе области традиционално им го доделува Град Скопје, по повод Денот на ослободувањето од фашистичкиот окупатор.
Сотир Трајков