Неформалната или „сива“ економија и понатаму е голем проблем за државата и покрај мерките за нејзино намалување. Најприсутна е во сезонските дејности, односно градежништвото и земјоделството, а Државниот завод за статистика проценува дека мажите повеќе се неформално вработени за разлика од жените. Нискоквалификуваните кадри најмногу циркулираат во сивата економија – односно, голем број на млади лица и пензионери, кои со самото тоа се изложени на секакви ризици, немајќи ниту некаква правна заштита.
Во земјоделството, стапката на неформални работни места беше проценета на 55%, во споредба со високи 84% во далечната 2011 година. Неформалното ангажирање на работници во градежништво задржува едно ниво од 36% во текот на целиот период. Приближно половината од неформалните вработени се во земјоделскиот сектор, изјави министерката Шахпаска.
На дискусијата за намалување на неформалната економија, владините претставници се обидоа да дојдат до одговори најпрво како истата да ја детектираат.
Први на листата за ветинг во МНР се дипломатите во земјите на НАТО
Вицепремиерот за борба против корупцијата Љупчо Николовски е на ставот дека неформалната економија бара креирање на мерки и политики, но неговиот колега од Владата, министерот за финансии, смета дека тоа не е доволно.
Мора да се демотивираат вработените во сивата економија. Тоа значи од една страна да се зголемат трошоците за тие што работат во сива економија, односно, да не може да се исплати да се работи во неформална економија. Од друга страна, високи казни за сива економија како и регуларни инспекциски надзори, рече Бесими.
Според проценките и анализите на УНДП, пандемијата со коронавирус оставила големи последици. Работниците што се послабо платени веќе многу страдаат и според сите проценки тоа не оди во прилог на искоренување на сивата економија.
Петар Догов