Кичевските средношколци од денес седнуваат во училишните клупи откако учебната година ја започнаа онлајн поради состојбата со пандемијата. Станува збор за повеќе од 1500 ученици од прва до четврта година во училиштата „Марко Милески“ и „Дрита“. Тие поради состојбата со четвртиот бран на зараза во земјава, учебната година на први септември ја започнаа пред екраните. Одлуките за промена на моделот на настава ги носи Владата по препорака на Комисијата за заразни болести.
Оваа одлука што ја донесе Владата за Општина Кичево се однесуваше за една недела, и по истекот на овој период, но и по проценка на Комисијата, учениците ќе продолжат настава со физичко присуство. Тоа што е особено важно да се потенцира е дека училиштата не се трансмитери на заразата и дека во секој случај кога има појава на ученик или наставник со симптоми на заразата, училиштата постапуваат согласно протоколите и алгоритмите, велат од МОН.
Од Министерството за образование и наука информираат во проценти – 0,02 отсто од вкупниот број на ученици и исто толкав процент и на наставници се водат како активни случаи на Ковид, нешто што засега не може да влијае на моделот на настава со физичко присуство, повторуваат надлежните. Во случај да во некое одделение се јават симптоми на зараза кај некое дете, се постапува согласно протоколите и се издаваат решенија за изолација. Само за споредба, во соседна Србија 379 класови веќе се префрлиле на онлајн-настава затоа што имаат потврдени два случаи на позитвни ученици – а, протоколот кај нив вели во тој случај, 10 дена онлајн настава за цело одделение.
Петар Догов
