Речиси 3 години откако спас од затворот кој му се закануваше во Македонија заради случајот Тенк побара во Унгарија, поранешниот премиер и актуелен бегалец од правдата, Никола Груевски, стана бизнисмен.
Како што јавуваат унгарските портали и Дојче Веле, Груевски регистрирал фирма со широка деловна активност во најмалку 10 сектори во малото унгарско гратче Пецел. Фирмата на Груевски е регистрирана за да се занимава со трговија на големо со порцелан и стакларија, како и со средства за чистење, потоа трговија на големо со храна, пијалоци и тутун, како и со друг вид стока.
Но тука не запираат бизнис амбициите на Груевски.
Фирмата е регистрирана и со план да се занимава со бизнис менаџмент, комуникации со јавност, рекламирање, истражување на пазари и испитување на јавното мислење, како и во организација на конференции и трговски изложби.
Регистрацијата на оваа фирма со очигледно широк бизнис модел го чинела Груевски 8 350 евра.
Екс премиерот не приложил лична адреса во Унгарија, туку ја искористил таа на неговиот адвокат во Будимпешта.