Украинскиот разузнавач кој претходно го призна убиството на жената поврзана со бомбашкиот напад во Монако го повлече сопственото признание и за делото обвини друг осомничен.
Владислав Реут, активен припадник на украинската воено-разузнавачка служба ХУР, пред судот изјави дека не ја убил Анастасија Березовска, жената за која властите во Монако ја бараа поради експлозијата, а која подоцна беше пронајдена мртва, со прострелна рана во главата.
Реут тврди дека за време на истрагата лажно го признал убиството, бидејќи друг осомничен, поранешен полицаец Виталиј Жикович, го присилил да преземе одговорност за делото кое, како што посочи, го сторил токму Жикович.
Двајцата беа уапсени под сомнение дека учествувале во убиството на Березовска. Реут го негира делото, но призна дека „за време на војната“ убивал луѓе. Пред судот раскажа дека Жикович, кој бил негов познаник, го замолил да ја сокрие Березовска која се вратила во Украина додека, како што му било решено, не бидат готови нејзините документи.
Но, кога тројцата се состанале, Жикович извадил пиштол и испукал четири куршуми, тврдејќи дека двајцата ќе бидат убиени, ако Березовска остане жива, раскажа Реут во судницата во Окружниот суд Печерск во Киев.