Антикорупционерите бараат струшкиот градоначалник Рамиз Мерко да одговара кривично поради финансиски малверзации потврдени во нивната истрага но и од државните ревизори. Кривична одговорност се бара и од претседателот на Кривичниот суд во Струга кој лично дозволил буџетот на Општината да изнесува 50 милиони денари иако таа беше една од најзадолжените.
Сомнителни јавни набавки, нерационални трошење и секако набавката на луксузното „ауди А6“ од 70 илјади евра за службено возило.
Антикорупциска поднесе иницијатива која од скопското преку струшкото обвинителство заврши во Обвинителството за организиран криминал каде се води уште една предистрага за нелегална продажба на објекти.
„Од 2018 година во Основното јавно обвинителство за гонење на организиран криминал и корупција се оформени три предмети од кои за еден е предизвикан судир на надлежност и истиот е препратен на надлежно постапување во ОЈО Струга. Во предметот за јавната набавка на Општина Струга на 3 автомобили и еден луксузен автомобил марка Ауди А6, што беше отворен по иницијативата поднесена од Комисијата за спречување на корупција и судир на интереси во 2019 година е во предистражна постапка и се чекаат наодите од вештачењето, по што ќе донесе јавнообвинителска одлука за понатамошниот тек на постапката. Што се однесува до другиот предмет истиот е за бесправна продажба на објект и исто така е во предистражна постапка. Со оглед на тоа дека предистражната постапка согласно закон е тајна во моментов за жал не може да се споделат детали во врска со предметот“, информираат од Обвинителството за гонење на организиран криминал
На денешната седница Антикорупционери ја запреа постапката против Нефи Усеини кој извесно време беше советник во Општина Охрид од редовите на ДУИ, но и сопственик на фирми кои добиваа општински тендери, дивоградби и плацеви во заштитената зона. Антикорупционерите отворија постапка за акумулација на функции но во меѓувреме Усеини се повлече од советничкото место.
За Антикорупциска нема ништо спорно и во предметот „Шпанско Село“ каде плацеви на Водно купиле мајката на сопругата на министерот за здравство Венко Филипче, заменик министерот за здравство Илир Хасани и бизнисмен кој со години соработува со министерството и е добитник на голем број на тендери.
Оттаму соопштија дека плацевите се купени во време кога не биле функционери, пријавени се како имот а бизнисменот десетина години назад ги добивал тендерите во здравствео бидејќи имал најквалитетни понуди.
Антикорупционерите заклучија дека во овој случај ги исцрпиле сите мерки и средства кои им се на располагање, доколку и понатму постои сомнеж предметот да го работат други институции и побараа носење на закон за потекло на имот.
Oгнен Чанчаревиќ