„Општинските организации Ѓорче Петров, Гази Баба, Тетово, Охрид, Битола, Прилеп, Велес, Пробиштип, Кочани, Берово, Делчево, Лозово, Радовиш, Дојран, Кисела Вода, Аеродром и Куманово, се оградуваме од нелегитимната и не статутарната “одлука” за коалицирање со ЛДП и ДС“, објавува општинската организација на ДОМ од Велес.
- Денес без кворум се овозможи да гласаат луѓе што не се членови на централниот одбор. Не беше дозволено да добиеме увид во списокот за да се сокрие нелегитимноста и нестатутарноста на “одлуката”. Ова демонстрира дека Претседателката нема коалициски капацитет бидејќи нема поддршка од 2/3 од општинските организации, велат од велешкиот огранок.
Според ДОМ Велес денешните случувања се продолжување на насилството што врз своите членови го прави актуелното претседателство.
Инаку, пред три дена, Пратеникот на ДОМ. Мирослав Богдановски си поднесе оставка од функцијата пратеник. Се враќа на претходното работно место – главен инспектор во град Скопје. Богдановски е уеверн дека ќе биде попотребен во градската инспекција отколку во Собранието. За Телма вели дека оставката ја поднел вчера и се уште не разговарал со претседателката на партијата Маја Морачанин, со која и онака немал добра соработка.
Раздорот во ДОМ кулминираше минатиот месец, кога беа разрешени потпретседателите Мирослав Богдановски и Ана Петровска, директорка на Државниот инспекторат за животна средина. Двајцата беа дел од иницијативата за вонреден конгрес, но Централниот одбор ја прогласи за нелегитимна и на обајцата им изрази недоверба.