Неколкучасовното убедување до полноќ во владата не ги предомисли помалите коалициони партнери: не даваат бланко поддршка за францускиот предлог. Бараат суштински измени, во спротивно нема да го гласаат и предлагаат референдум. Издејствувале од премиерот, за ова прашање да се расправа на пленарна седница во Собранието, кое ќе треба да ја понесе и одговорноста за евентуално изгласаните заклучоци, но само ако има одлука со општ консензус. Демократски сојуз и ДОМ условиле и со свои барања.
Трајанов бара реципроцитет и за историските и образовните прашања, говорот на омраза и отворањето на досиеја за прогонувани лица од комунистичкиот режим. За македонските ревулуционери, Гоце Делчев, Јане Сандански, Дамјан Груев и други, пак, вели дека не смеат да се водат разговори, а бара и да се прекинат дискусиите за заедничко славење на македонските национални празници. Тврди и дека, никој не нѐ врзува за рок и не треба да се брза со одлуката додека предлогот не биде прифатлив за сите.
И ДОМ се конзистентни во ставот дека, отворените билатерални прашања со Бугарија не треба да бидат дел од преговарачкиот процес.
Од ДОМ побарале и сите документи од овој процес, не само рамката, да бидат преведени на македонски јазик и да бидат достапни до јавноста, што од Ковачевски било прифатено. Од овие партии тврдат и дека, не е точно дека документот не може да се преработи, затоа што на протоколот сѐ уште работат комисиите од двете министерства за надворешни работи и корекции може да се вметнат.
Партиите на Албанците прифаќаат за ова да се расправа на пленарна седница, иако за нив францускиот предлог е прифатлив.
Доколку се отвори Уставот, и од двете партии имаат свои барања, а клучното е да се избрише процентот 20 отсто за правата на Албанците.
Пратениците за ова најверојатно ќе расправаат во четврток. За утре е закажана владина седница, но предлогот сѐ уште не е ставен на дневен ред затоа што партиите немаат изградено поединечни ставови. Вечерва тројцата претседатели на ДС, ЛДП и ДОМ се поканети на средба кај претседателот Пендаровски.
Далиборка Демјанска Цветановска