На социјалдемократите, кои освоија најмногу гласови на парламентарните избори во неделата, им е потребна поддршка од Зелените и либералите за да формираат нова влада која ќе ги замени конзервативците по 16 години на власт.
Лидерите на Либерално-демократската партија (ФДП) и Зелените, две помали партии чија поддршка одредува кој ќе стане следниот германски канцелар, започнаа разговори за формирање влада.
Во потрага по нова влада, ние бараме заеднички јазик и мостови околу работите што нe делат, дури и наоѓаме некои, соопштија утрово преку Инстаграм Аналена Бербок, која беше кандидатка на Зелените за канцелар на парламентарните избори и лидерот на ФДП, Кристијан Линднер. Тие објавија и заедничка фотографија со лидерот на Зелените Роберт Хабек и генералниот секретар на либералите Фолкер Висинг.
Двете помали партии одлучија прво да разговараат меѓу себе пред да започнат преговори со една од партиите што освои најмногу гласови, СПД и конзервативната унија ЦДУ-ЦСУ.
Иако имаат некои заеднички точки, тие традиционално припаѓаат на спротивставените идеолошки кампови и имаат различни пристапи кон прашања, вклучувајќи економија и борба против климатските промени.
Во последните децении, Зелените се стремат кон Социјалдемократите од левиот центар, кои победија на парламентарните избори со мала предност, предводени од Олаф Шолц.
Либералите (ФДП) беа блиски до Ангела Меркел и конзервативната унија ЦДУ/ЦСУ, која го забележа најлошиот резултат досега со Армин Лашет, освојувајќи го второто место.
Единствената друга комбинација на партии што би имале мнозинство во парламентот е договорот на „големата коалиција“ во заминување на двете големи партии, што ниту една од нив не посакува.