Водата од градскиот водовод во Валандово привремено не е безбедна за пиење, откако анализите извршени од Институтот за јавно здравје – Скопје покажале зголемено ниво на арсен. Од ЈП „Комунален сервис“ во Валандово информираат дека, согласно добиените резултати, се препорачува граѓаните до понатамошно известување да не ја користат водата од градскиот водовод за пиење. Водата може да се користи исклучиво како техничка вода.
Од јавното претпријатие посочуваат дека веќе се преземаат сите неопходни мерки за утврдување на состојбата и дека во соработка со надлежните институции се вршат дополнителни анализи и контроли на квалитетот на водата.
„За сите понатамошни резултати и препораки јавноста ќе биде навремено информирана“, наведуваат од ЈП „Комунален сервис“ Валандово.
Од претпријатието апелираат до граѓаните да ги почитуваат препораките и да не ја користат водата за пиење, сѐ додека не биде издадено официјално соопштение дека таа е исправна и безбедна за употреба.
