Косовски државјанин е лишен од слобода откако на граничниот премин Блаце се обидел насилно да ја премине граничната линија за да избега од царинска контрола, при што криумчарел околу еден килограм марихуана и го довел во опасност животот на царински службеник.
Од Царинската управа информираат дека против лицето Р.Е. е поднесена кривична пријава поради основано сомнение за сторени кривични дела „неовластено производство и пуштање во промет на наркотични дроги, психотропни супстанци и прекурсори“ и „спречување службено лице во вршење службено дејствие“.
Инцидентот се случил на 15-ти јули во вечерните часови, кога двајца царински службеници го запреле возилото за детална контрола. Откако еден од службениците забележал сомнителна кеса под совозачкото седиште и се обидел да ја провери, осомничениот влегол во автомобилот и со сила тргнал да бега, повлекувајќи го цариникот кој се обидел да го спречи. Веднаш била известена Граничната полиција, која заедно со царинските службеници, по десетминутна потера, му го пресекла патот на возилото, по што осомничениот бил приведен.
За време на бегството, тој ја фрлил кесата со дрога, која подоцна била пронајдена во близина на местото на приведувањето. По наредба на јавен обвинител, извршено е вештачење, при што било утврдено дека станува збор за околу еден килограм марихуана. При претресот кај осомничениот било пронајдено и ладно оружје.
Случајот го презело Одделението за истраги при Секторот за контрола и истраги на Царинската управа, кое по спроведените истражни дејствија поднело кривична пријава до Основното јавно обвинителство Скопје.