МВР соопшти дека против вкупно 9-мина од кои 5 возрасни и 4 малолетнички (деца) поднесе кривични пријави по инцидентот во паркот „Ентер“ во Аеродром во Скопје кога 12-годишно девојче беше малтретирано од други деца, додека поголема група на врсници „навиваа“ додека пред нивните очи девојчето беше малтретирано и удирано.
Полицијата соопшти дека осомничените биле испрашувани и откриени од страна на полициските службеници во ОКР Аеродром и Драчево, а во истрагата учествувале и припадници на полициската ОКР Кисела Вода, бидејќи меѓу осомничени има и деца од Аеродром, но и од соседната општина Кисела Вода кои биле во паркот „Ентер“.
Две девојчиња се осомничени за насилство и се на возраст над 14 години. Едната ја удирала со шамари, додека второто девојче ја држело за коса и ја терало да клечи пред поголема група малолетници. Едно осомничено момче се гони за потикнување и за неовластено снимање. Уште едно малолетно момче е осомничено за неовластено снимање.
Со пријавата се опфатени и 5 родители, мајки и татковци на трите првоосомничени малолетници. Настанот ја згрози јавноста бидејќи на очигледно насилство, малолетните деца наместо да помогнат, се ситат на жртвата, ја навредуваат и и се смеат додека таа е клекната на колена. Едно момче кое снима дури вика сите да молчат за да се слушне подобро одмаздничката шлаканица која треба да ја удри девојче кое сега е осомничена за насилство.
Во продолжение целото соопштение на МВР:
СВР Скопје целосно го расчисти случајот од 30.06.2026 во 21:40 часот во парк во општина Аеродром, кога 12-годишно девојче, беше физички нападнато од малолетнички, а други присутни малолетници снимале со мобилни телефони.
Од страна на ОКР Аеродром и Драчево во содејство со ОКР Кисела Вода до ОЈО Скопје е поднесена кривична пријава против две малолетнички за сторено кривично дело „насилство“, предвидено и казниво по чл. 386 од Кривичниот законик, против еден малолетник за сторени кривични дела „поттикнување“ предвидено и казниво по член 23 од Кривичниот законик во врска со член 386 став 1 од Кривичниот законик и „неовластено снимање“ предвидено и казниво по член 152 во врска со член 386 став 1 од Кривичниот законик, против еден малолетник за сторено кривично дело „неовластено снимање“ предвидено и казниво по член 152 во врска со член 386 став 1 од Кривичниот законик, како и против родителите И.В., М.В., М.П., И.А. и И.А. за сторено кривично дело „запуштање и малтретирање на дете“ предвидено и казниво по член 201 од Кривичниот законик.
Миомир Серафиновиќ