Властите во Рим, заедно со католичката заедница „Сант’Еџидио“, спроведуваат активности за заштита на повозрасните граѓани кои живеат сами за време на екстремно високите температури… Преку програмата „Да живеат старите“, волонтери ги посетуваат старите лица, им носат намирници, финансиска помош и им обезбедуваат социјална поддршка.
Според координаторите на проектот, секое второ лице постаро од 80 години во Рим живее само, што значително го зголемува ризикот за време на топлотните бранови. Градот годинава бележеше 15 последователни денови со највисоко ниво на предупредување поради жештините.
Општината во Рим најави дополнителни мерки за справување со високите температури, меѓу кои се зголемување на зелените површини, садење дрвја и воспоставување систем за следење на старите лица кои живеат сами. Експертите посочуваат дека пошумувањето може да ја намали температурата во урбаните средини и до четири Целзиусови степени.