Протестите во Белград предводени од студентите повторно завршија со судир меѓу полицијата и демонстрантите.
Нередите овој пат избија пред самиот крај на протестот, кога група демонстранти започна да фрла петарди во кампот на поддржувачите на власта, колоквијално познат како „Чациленд“.
Поради тоа во паркот каде што се наоѓа кампот пристигнаа припадници на полицијата и жандармеријата, по што и тие станаа мета на камења, шишиња, факели и други предмети.
Полицијата интервенираше во обид да ги истисне демонстрантите од плоштадот Славија, кои пак одговорија со палење и превртување на повеќе контејнери за отпад, за да ја забават полицијата.
Министерот за внатрешни работи Ивица Дачиќ вечерва изјави дека 23 лица се приведени за напади врз полицајци по протестите во центарот на Белград. Дачиќ на прес-конференција изјави дека инцидентите се случиле по завршувањето на собирот на плоштадот Славија.
Според него, екстремна група демонстранти ја пробила безбедносната ограда и ги нападнала полицајците, биле фрлани камења, шишиња и пиротехнички средства, како и дека шахтите биле отстранети за да се користат за напади.