Скопската полиција ќе направи и предложи посебен специјален протокол при закани за поставени експлозивни направи во трговски центри и шопинг молови откако во два викенда по ред, трите најголеми шопинг молови во Скопје беа предупредени со лажни закани за бомби. Проверките на заканите кои по правило се лажни, покрај паниката меѓу посетителите предизвикуваат и кратење на можноста и времето за трговија во трговските центри.
Протоколот,според она што ни беше посочено, ќе ја зголеми соработката и комуникацијата меѓу полицијата во главниот град и обезбедувањето на трговските центри и моловите, а треба да ја зголеми и превентивната функција на обезбедувањето на центрите за тие да може самостојно да вршат проценки за можни закани и сомнителни активности на посетители.
На тој начин, ќе се намали времето за проверка на заканите кои досега се покажале како злажни. Последната беше синоќа, во сити мол, кога два часа пред затварањето беше извршена евакуација. Проверката покажа дека повторно станува збор за лажна закана испорачана преку имејл.
Во 9 ќе бидат активирани поставените бомби, така гласела електронската порака која стигнала на повеќе имејл адреси во Скопје, меѓу кои и до полицијата. Од скопската полиција велат дека мејлот пристигнал попладнево со назначено време за експлозија. Мејлот бил новоотворен и имал име кое не може да се поврзе со определен човек односно не постои.
Мејлот од кој стигнала заканата е од странска ИП адреса, а во истрагата се вклучени оделот за компјутерски криминал на МВР како и Интерпол од кој се бара помош за евентуално лоцирање на странската ИП адреса. Минатиот викенд, слични лажни закани имаше и за моловите ИстГејт и Дајмонд.
Миомир Серафиновиќ