Рис, црвен лав или нешто сосема друго? – Партиите веќе почнаа да нудат идеи за главниот симбол на државниот грб, откако вчера премиерот откри дека со коалиционите партнери го отвориле прашањето за промена. ЛДП предлагаат, рисот кој се наоѓа и на металната петденарка и на националниот фудбалски дрес, да го краси и државниот грб. Нема да создаде проблеми со соседните држави, потекнува од Шар Планина и ќе симболизира поглед кон иднината, наместо „враќање назад во минатото“. Од „Македонски концепт“ ја поздравија идејата за промена, но опозициската СДСМ остро се спротивстави.
Филипче ја повика власта да одговори дали во рамки на коалицијата на ВМРО-ДПМНЕ и „Вреди“ се разговарало и за промена на државната химна? – Одговорот дојде од Касами, кој вели дека се отворени за цел пакет на промени.
Премиерот вчера потврди дека прашањето е отворено во владеачката коалиција.
Идејата за промена на државниот грб потекнува од 2014 година, кога владата на Никола Груевски излезе со предлог за црвен лав на златно-жолта заднина во форма на штит, како и круна во горниот дел во форма на тврдина. Тогаш од ДУИ се согласија, велејќи дека лавот е дел и од албанската традиција, а круната го претставува Скопското кале, но консензус не беше постигнат. Засега не се открива дали во разговорите се зборува за овој предлог или ќе се нудат нови решенија.
Граѓаните, пак, се изненадени и загрижени, особено за тоа дека во таков случај повторно би требало да ги менуваат личните документи кои само што ги сменија поради промената на името на државата.
Далиборка Демјанска Цветановска