ЕСМ бара поскапување на парното. Минатиот месец од компанијата до регулаторната комисија поднеле барање за зголемување на цената на греењето со образложение дека им се пораснати трошоците за гас.
„Со поднесеното барање, Друштвото бара зголемување на трошокот за гориво за 2024 година во износ од 12,92%“, пишува во документот во РКЕ.
Регулаторната комисија до крајот на оваа недела се очекува да закаже и седница на која ќе се разгледува барањето на ЕСМ и ќе се донесе одлука.
ЕСМ го поништи и претходно објавениот повик за набавка на гас за месец февруари. Од компанијата за Телма тврдат дека причина за тоа е цената која била понудена.
„Не беше извршен избор за најповолен понудувач, затоа што не беше постигната таргетирана цена со која ќе се остварат пониски трошоци при производство на топлинска енергија кај регулираниот производител“, пишува во дописот на ЕСМ до Телма.
Веќе е објавен и нов повик на кој се бараат количини на гас за да се покријат потребите за идниот месец.
Минатата година со стартот на грејната сезона беа набавени количини за три месеци. Сега тоа се прави за период од еден месец. Од министерството за енергетика на прашањето дали може би се има криза за гас со затворањето на вентилот од страна на Украина, вчера одговорија дека проблеми нема.
За време на енергетската криза ЕСМ го презеде менаџирање на парното во Скопје од БЕГ кој имаа потешкотии во работењето. Заради тоа електрани формираа три компании за производство, дистрибуција и снабдување. Но, сите се на листата на должници од финансии. Со најголем долг од 34 милион евра е токму ЕСМ Дистрибуција кој бара поскапување на греењето.
Градско парно користат над 60.000 домаќинства.
Ирена Чачкова