Парите од унгарскиот кредит се тука, на банките е да одлучат дали сакаат да помогнат или не, односно дали ќе покажат општествена одговорност и ќе се откажат од банкарските трошоци. Ова е ставот на премиерот Христијан Мицкоски во пресрет на средбата со банкарите која треба да се одржи викендов, а на која треба да се прецизираат деталите и да се пресече дали и преку која комерцијална банка ќе се пласираат средствата за бизнисот.
Мицкоски бара од банкарите да бидат општествено одговорни и да не им наплаќаат на компаниите дополнителни трошоци за кредитите од унгарските пари.
Двесте и педесет милиони евра како кредити ќе бидат пласирани во бизнисот, односно стопанството со каматна стапка од 3,25 отсто со грејс период до три години и рок на отплата од 12 години. Според неофицијални информации, банкарите за да се нафатат да ги пласираат овие средства, побарале приближно исто да изнесуваат и банкарските трошоци, односно 3,25 отсто камата.
Министерката за финансии Димитриеска Кочоска соопшти дека поради ризикот кој го преземаат банките и во случај да се појави ризичен кредит инсистирале каматата да ја покрие државата и од Владата се согласиле, односно дополнителните 3,25 отсто да бидат покриени од Буџетот и парите на граѓаните. Димитриеска во интервју за „360 степени“ откри дека една банка прифатила да субвенционира дел од каматата за кредитите за фирмите од заемот од Унгарија, но не откри која.
Уште еден проблем за кој се преговара е рокот на враќање на кредитот. Во банкарскиот сектор тој е од 7 до 10 години, а од Владата бараат да биде 15 со три години грејс период.
Во меѓувреме се огласија и од бизнис секторот од каде побараа итно да се вбризгаат свежи пари во стопанството, бидејќи се неопходни.
Огнен Чанчаревиќ