Агим Красниќи и Сехат Рамадани се екстрадирани од Косово и се предадени на надлежните судски органи. Нивното испорачување се случило во текот на вчерашниот ден, потврдија од министерството за внатрешни работи (МВР) за Телма. Тие се сместени во затворот во Штип за доиздржување на казната на која беа осудени, каде не се вратија по слободен викенд во 2020 година.
И Красниќи и Рамадани треба да одлежат уште три од вкупно 15 години затвор колку што добија во 2008 година. Беа осудени за повеќе кривични дела, поврзани со киднапирање, насилство, изнуди и нелегално оружје.
Красниќи беше дел од т.н. „кондовска група“ која во 2004 и во 2005 година се поврзуваше со повеќемина осомничени насилници од Косово.
Красниќи беше уапсен во Косово во април оваа година. Во рацете на полицијата падна во Урошевац, заедно со неговиот брат Бесим Красниќи, Фадил Точи и Рамадани.
Красниќи во Косово е осомничен за убиство во обид, а Рамадани и Точи за учество во тепачка. Сите четворица се барани по меѓународна потерница што ја распшиша Македонија.