Беше медијатор за договорот за Пржинска влада, во наредниот период ќе биде и олеснувач за уставните измени за расчистување на патот на земјава за членство во Европската Унија. Питер Ванхојте се враќа во Македонија, објави Независен. Белгискиот политичар, како што објави порталот, веќе е во Скопје на средби со претставници на политички партии, но и со невладини организации по што ќе отпатува на разговори и во Софија за надминување на разликите во македонско-бугарскиот спор. Негова главна цел, како што наведе, ќе биде осигурување дека пристапниот процес на Македонија кон ЕУ повеќе нема да се блокира. Најави оти е отворен за сите опции, ќе ги слушне сите барања во обид да изнајде взаемно прифатливо решение.
Најновиот проект на кој е ангажиран, како што истакна Ванхојте, е по иницијатива на белгиското претседателство со Европската Унија. Истиот ќе биде финансиран од белгиската влада и содржи две компоненти – првата е медијаторство за односите меѓу Скопје и Софија за отстранување на отворените прашања и отворање на патот за преговори на Македонија со ЕУ. Втората компонента е градење на институционален капацитет на земјава во чиј фокус ќе биде обука на млади политичари за менување на начинот на кој функционира политиката во земјава и нејзино поголемо приближување до западните демократии.