Македонската машка ракометна репрезентација денеска замина за Порто каде утре против селекцијата на Португалија ќе го одигра вториот дуел од квалификациите за Европското првенство.
Селекторот на националниот тим Кирил Лазаров се реши да поведе 18 играчи кои ќе бидат во конкуренција за место во екипата, а конечниот состав ќе биде познат по одржувањето на редовниот тренинг.
Покрај играчите кои беа дел на натпреварот во Скопје кој Португалија го реши во своја полза со 29:23 во конкуренција се уште Михајло Младеновиќ и Михаил Аларов, а од поширокиот список отпаднаа голманот Марко Кизиќ и Ален Ќосевски.
Дуелот со Португалците се игра во Матосињош, а почетокот е закажан за 18 часот и 30 минути.
Во завршните два дуели од квалификациите за континенталниот шампионат во април не очекуваат соочувањата со Луксембург и Турција на кои треба да го верификуваме новиот настап на големите натпреварувања.
ФОТО: Игор Паневски