Агенцијата за млади и спорт (АМС) работи според законите и прописите, а наводите на Антикорупциската комисија се неосновани и неточни и имаат лукративна позадина. Ова е одговорот на директорот на АМС, Наумче Мојсоски на барањето на Антикорупциска за кривична одговорност поради финансиски малверзации и злоупотреби при доделувањето на спортски ваучери.
Од АМС информираат дека Совет за спорт, а не Комисијата која што беше посочена од Антикорупционерите ги доделува ваучерите на федерациите и спортистите.
„Членовите на Централната комисија се на предлог на Владата, но тие не се оние кои ги „доделуваат” ваучерите за даночно ослободување, туку се административна комисија која врши само административно-техничка обработка и евалуација на пристигнатите апликации и предлог-листата ја доставува до Советот за спорт. Советот за спорт во рок од 5 дена од приемот на предлог- листата на спортски субјекти кои ги исполнуваат критериумите за користење на средства од даночното ослободување, на седница ја утврдува и усвојува предлог ранг листата“, велат од АМС.
Мојсоски смета дека не е коинциденција што Антикорупциска во петокот побара кривична одговорност, како и претседателот на Македонскиот олимписки комитет (МОК), Даниел Димевски кој се обрати до Владата и побара разрешувања во Агенцијата.
Антикорупциска која три години работела на предметот за доделување на ваучери за спортските федерации и спортисти утврди дека системот има многу пропусти, нема отчет и контрола на доделените пари, а нејасно е и по кој систем се доделуваат пари и кој треба да провери како се трошат. Годишно АМС доделува една милијарда денари или 16 милиони евра на федерациите и спортистите.
Огнен Чанчаревиќ