Во овие моменти во арената „Борис Трајковски“ почнува ракометниот спектакл на кој ќе се соочат поранешните македонски репрезентативци против актуелниот состав на селекцијата во ревијален натпревар. Ракометната федерација со овој настан сака да им оддаде почит на сите поранешни македонски легенди кои го носеле националниот дрес, а не добиле вистинско испраќање во пензија.
Нашите поранешни репрезентативци ќе добијат специјални плакети за особен придонес во македонскиот ракомет, како и врамени дресови.
Во таборот на легендите ќе играат играчи како Стевче Алушовски, Ванчо Димовски, Филип Миркуловски, Раде Стојановиќ, Александар Јовиќ, Бранко Ангеловски, Ацо Јоновски, но тука ќе бидат и двајца кои сѐ уште се активни играчи, но веќе не се дел од репрезентацијата, а тоа се Стојанче Стоилов, Борко Ристовски и многу други.
Во тимот на ветераните ќе игра и Кирил Лазаров, кој ќе се соочи против неговите актуелни избраници во националниот тим.
Ревијалниот натпревар ќе трае два пати по 15 минути. Салата „Борис Трајковски“ е целосно распродадена, а сите пари собрани од продажбата на билетите ќе одат за СОС Детското село.