Шпанската полиција соопшти дека за најмалку 39 луѓе има потврда дека се мртви во сообраќајната несреќа на брз воз што се случи на југот од земјата.
Напорите за пронаоѓање на телата продолжуваат, а властите очекуваат бројот на жртви да се зголеми.
Несреќата се случила во недела во 19:45 часот кога задниот дел од возот што превезувал околу 300 патници на линијата од Малага до главниот град Мадрид излетал од шините.
Според железничкиот оператор Адиф, тој се судрил со воз што доаѓал од Мадрид до Хуелва, друг град во јужна Шпанија.
Претседателот на државно финансираната фирма „Ренфе“, која управуваше со еден од возовите вклучени во судирот, рече дека ја „отфрлил“ можноста инцидентот да се случил поради прекумерна брзина или човечка грешка.
Според Алваро Фернандез Хередија човечката грешка е „практично отфрлена“, бидејќи дури и да била направена грешка, системот во возот би ја поправил.
Тој посочи дека двата воза биле под максималната брзина од 250 км/ч на делот од пругата каде што се случила несреќата и дека се случила на прав дел од пругата, а не на кривина.
- „Имаме 75 лица хоспитализирани во различни болници. Особено во Реина Софија во Кордоба. 15 од нив се во критична состојба. Во моментов се спроведуваат хируршки процедури и сакам да им се заблагодарам на сите здравствени работници. Побаравме масовна мобилизација за да бидат подготвени да помогнат“ – Хуанма Морено, регионален претседател на Андалузија.
Од црвениот крст велат дека ситуацијата е сложена, а итните служни од синоќа биле на местото на несреќата. Голем е бројот на членовите на семејствата кои бараат информации за своите најблиски.
- „Луѓето беа во многу нервозна состојба, што е логично и нормално во овие моменти, со луѓе кои бараат членови на семејството или пријатели кои можеби биле во истиот конвој. Па, ова се некако хаотични и неизвесни времиња во овие првични моменти, особено. И исто така, не беше лесно да се пристапи преку сервисни патишта или земјоделски патеки, бидејќи несреќата не се случи на станица, туку во средината на селото“ – Ињиго Вила, Црвен крст Шпанија.
Судирот ги уништи првите два вагона од пругата и ги фрли во падина од 4 метри.
Судирот се случил во близина на Адамуз, град во покраината Кордоба, околу 370 километри јужно од Мадрид.
Спортски центар веднаш беше претворен во импровизирана болница во Адамуз, а Шпанскиот Црвен крст отвори центар за помош кој им нудеше помош на службите за итни случаи и на луѓето што бараа информации.
Членови на шпанската цивилна гарда и цивилната одбрана работат на лице место во текот на целата ноќ.
Билјана Ставрова