Договорено е гласање за законот за прекршоци со две опозициски партии, ама нема да биде ставено на собраниска седница утре како што беше првично планирано, туку ДУИ барале дополнителни консултации и гаранции дека нивните забелешки ќе бидат прифатени.
Со изгласување на законот за прекршоци ќе почне и ефективна примена на системот „Сејф сити“, односно казнувањето на сообраќајните прекршоци.
Левица и ДУИ дале согласност за законот, иако останале на своите забелешки за примената и евентуалното нарушување на права и на јазична еднаквост на денешната средба во Собранието. Координаторот на пратеничката група на ВМРО-ДПМНЕ, Никола Мицевски ни изјави дека на денешната, како што ја нарече неформална координација, на која учествувале и координаторите на ВРЕДИ, Левица и ДУИ, добиена е нивна поддршка за да се изгласа законот за кој е потребно двотретинско мнозинство.
Мицевски вели дека биле сослушани забелешките на партиите кои биле изнесени на вчерашната лидерска средба. Договорено било забелешките да се решат во наредниот период. На координацијата бил повикан и претставник на МВР, но не бил поканет координаторот на СДСМ.
СДСМ сè уште нема одлучено како ќе се постави кон законот, ни изјави координаторот на СДСМ, Оливер Спасовски кој потврди дека не бил на координацијата. СДСМ има забелешки и за начинот како ќе се управува со податоците собрани со овој голем систем за да не се случи злоупотреба на „Сејф сити“.
Со промените на законот за прекршоци се овозможува целосна примена на „Сејф сити“ и од 1 февруари да почне испраќање на казни по системот за прекршителите на законот, односно за оние возила кои ќе поминат на црвено или ќе возат побрзо од дозволеното.
Најчувстително е прашањето за чувањето на податоците собрани од системот кои не се бришат најмалку 30 дена. Со софвтерската надградба сега „Сејф сити“ има можност за автоматизирано пребарување и откривање на податоци за движење на автомобили по регистарски таблички.
Миомир Серафиновиќ