Шведската царинска служба денеска соопшти дека надлежните органи се качиле на руски товарен брод кој во петокот бил закотвен во шведските води по проблеми со моторот и оти во тек се инспекција и контрола на товарот.
Портпаролот на царинската служба Мартин Хоглунд изјави дека бродот „Адлер“, чии сопственици се наоѓаат на листата на санкции на Европската унија, е прегледан со поддршка на шведската Крајбрежна стража и полицијата.
Непосредно по еден часот по полноќ се качивме на бродот за да извршиме царинска контрола. Инспекцијата сè уште е во тек, рече Хоглунд, додавајќи дека засега не може да изнесе други детали.
Според податоците на сервисот за следење на пловидбата „Marine Traffic“, „Адлер“ е контејнерски брод, долг 126 метри, кој е закотвен кај градот Хаганес, на југозападот на Шведска. Бродот и неговата сопственичка компанија „M Leasing LLC“ се наоѓаат и под санкции на САД поради сомнеж за вмешаност во транспорт на оружје, наведува базата на податоци „OpenSanctions“.
Хоглунд рече дека бродот испловил од руското пристаниште Санкт Петербург на 15 декември и оти шведската царина нема информации за неговата крајна дестинација.
