Од утрово започнаа да важат новите сообраќајни правила. Казните се 40 евра за пешаци, а 50 евра за возачите на останатите возила.
Телма денеска направи обиколка на терен да види како се почитуваат новите правила. На булевар „Партизански одреди“ имаше полициска контрола. Сите кои користеа телефон или слушалки добија опомена, но полицајците предупредија дека од следните денови ќе следуваат и парични казни.
Граѓаните кои ги анкетиравме ја поддржуваат мерката и очекуваат дека ќе се намали бројот на сообраќајни незгоди предизвикани од невнимание.
Од МВР велат дека измените се воведени заради поголема безбедност на најранливите учесници во сообраќајот и апелираат сите да ги почитуваат правилата, бидејќи безбедноста на патиштата е заедничка одговорност.
Често на булеварите се случуваат сообраќајки токму на пешачки премини, кога невниманието и брзината завршуваат трагично. Таков беше и случајот со 22-годишната Фросина Кулакова, која на почетокот на оваа година беше прегазена пред „Силбо“ од возило што се движело со над 130 километри на час. Новите измени во законот треба да помогнат ваквите трагедии да се избегнат.
Тамара Марковска