Рускиот министер за надворешни работи, Сергеј Лавров, го обвини Западот дека се меша во внатрешните работи на Босна и Херцеговина и ја дестабилизира ситуацијата во регионот. По средбата со лидерот на босанските Срби, Милорад Додик, во Москва, Лавров изјави дека „во Босна моментално се случува вистински државен удар“ и обвини дека западните сили стојат зад обидите за рушење на државната структура одобрена од Советот за безбедност на ОН.
Во август, Централната изборна комисија на Босна го разреши Додик од функцијата претседател на Република Српска, по судска пресуда со која беше осуден на една година затвор и шестгодишна забрана за политичко делување.
Додик ја отфрли пресудата и најави дека ќе продолжи да дејствува како претседател додека има поддршка од парламентот на Република Српска. Поддршка доби и од српскиот претседател Александар Вучиќ и унгарскиот премиер Виктор Орбан.
Додик долго време се залага за отцепување на Република Српска и приклучување кон Србија, што предизвика санкции од САД и критики од ЕУ. Неговата реторика ја зголемува загриженоста во Босна, каде се уште се свежи сеќавањата на војната од 1992-1995 година.
Мировниот договор од Дејтон воспостави два ентитети – Република Српска и Федерацијата на Босна и Херцеговина – со широка автономија, но заеднички институции. Додик постојано го оспорува авторитетот на високиот меѓународен претставник, Кристијан Шмит, кој има овластување да носи одлуки и закони според Дејтонскиот договор.