Вчера судот го ослободи Никола Груевски во случајот „Талир 2“.
Ова не е изненадување. Тоа е уште еден доказ дека правосудството во Македонија е под директна контрола на Христијан Мицкоски и неговата организирана криминална група ВМРО. Груевски не е ослободен затоа што е невин. Тој е ослободен затоа што Христијан Мицкоски го заштити својот ментор, ова во соопштение денеска го пишува опозициската СДСМ.
- Сè што се случува во правосудството во последните две години покажува дека Мицкоски има целосна контрола врз обвинителството и судовите. Тој јавно дава задачи од собраниската говорница, преку медиуми и преку телефон. Таканареченото „независно“ обвинителство постојано постапува според политичките налози од Белата палата, велат од партијата.
Од СДСМ истакуваат дека кога Мицкоски сака некој да биде заштитен, тој е заштитен. Кога сака некој да биде гонет, тој е гонет. Според нив вчерашната одлука за Груевски е уште една потврда за тоа.
- Никола Груевски со години е бегалец во Унгарија, под заштита на Виктор Орбан. Денес, благодарение на Христијан Мицкоски, тој добива и судска заштита во Македонија. Сè што Мицкоски правеше изминатиот период, од одбивање да ги испрати документите за екстрадиција, до јавните пораки и притисоци врз институциите, беше насочено кон заштита на својот политички татко и ментор, стои во соопштението.
Од СДСМ прашуваат: Дали Мицкоски и за овој случај имаше „чувство“?
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.