Високата претставничка на Европската Унија за надворешна политика и безбедност, Каја Калас предупреди дека предложените територијални отстапки се „стапица на Путин за Западот“. Таа е против таквиот предлог и нагласи дека Киев не треба да биде под притисок да се откаже од територии, како дел од мировниот договор со Москва.
Во интервју за „Би-Би-Си“, нејзино прво по учеството на дел од европските лидери на неодамнешниот состанок со претседателите на САД и на Украина, таа призна дека во Вашингтон имало малку „конкретни чекори“ за одвраќање.
„Најсилната гаранција за безбедноста е силна украинска армија“, рече Калас, нагласувајќи ја важноста од воспоставување на безбедносни гаранции за Украина кои „не се само на хартија“.
Калас, исто така, нагласи дека на земјите-членки на „Коалицијата на подготвените“ е да утврдат што точно можат да придонесат за мирот во Украина, но дека сè уште не е јасно во каков капацитет ќе дејствуваат овие сили. Додаде дека Путин добил „сè што сакал“ на средбата со Трамп на Алјаска на 15 август и дека тоа ќе влијае на неговиот интерес за преговори за мировен договор.
„Тој беше добро примен и не сакаше санкции, што и го постигна. Русија не сака мир. Путин само се смее, не запира, туку ги зголемува убиствата. Забораваме дека Русија не направила ниту една отстапка“, рече Калас.