Претседателскиот кандидат на Коалицијата предводена од СДСМ, Стево Пендаровски, на митинг во Ѓорче Петров говореше за сработеното во изминатите седум години, упати остри критики кон опозицијата и побара масовен одзив на граѓаните и на претседателските и на парламентарните избори.
Претседателскиот кандидат на Коалицијата предводена од ВМРО – ДПМНЕ, Гордана Силјановска Давкова, од митингот во Прилеп порача дека легитимитетот се добива на избори со програма, а не со ветувања кои не се исполнуваат. Според неа, Македонија се наоѓа далеку од европските стандарди, нема владеење на правото, а власта е концентрирана кај неколкумина.
Претседателскиот кандидат на ЛЕВИЦА, Билјана Ванковска на средбата со жителите на Центар во Скопје уште еднаш ги повтори своите цврсти ставови за раскинување на трите договори. Ја критикуваше препораката на Владата денот на гласањето да биде неработен само за јавната администрација.
Претседателскиот кандидат на ГРОМ, Стевчо Јакимовски, предлага целосна реформа на законите за локалната самоуправа, за град Скопје, за домување и други закони кои ги регулираат обврските на општините и на јавните претпријатија. Смета дека идниот претседател има право да отвори јавна дебата за подобрување на функциите на „четвртата власт“ во државата.
Максим Димитриевски не сака да се пазари за уставни измени. Пораката на овој претседателски кандидат е упатена до сите кои водат моноетничка политика и бараат кршење на основите на Охридскиот договор, кој, според него, целосно е реализиран.
Министерот и претседателски кандидат Бујар Османи ќе ѝ предложи на Владата излегување од Отворен Балкан. Поради инцидентот во Бањска смета дека Македионија треба да ја напушти иницијативата.
Кандидатот за претседател Арбен Таравари го посети пазарот во Велес. Најавува дека ќе се ангажира за подобрување на условите за работа на помалите бизниси. Очекува наредните години да бидат реформаторски за бизнис секторот.