Стефатни Вениер на спустот во Кортина д’Ампецо стигна до својата втора победа во кариерата во рамки на Светскиот куп во алпско скијање. На победничкиот подиум денеска имаше дури пет скијачки, а лидерката во генералниот пласман Микаела Шифрин имаше опасно излетување.
Вениер до триумфот стигна со време од 1:33,06 минути. Зад Австријката со 39 стотинки послабо време финишираше Лара Гут-Бехрами од Швајцарија. Интересно денеска на подиумот се искачија дури пет скијачки, бидејќи три мораа да го поделат третото место поради идентичен резултат.
Валери Грение, Кристина Агер и Софија Гоџа остварија време од 1:33,77 минути.
Микаела Шифрин не ја заврши денешната трка во спуст, бидејќи имаше тешко излетување, а информациите велат дека Американката нема посериозно повреди.
Гоџа е лидер во спуст со 290 бодови, пред денешната победничка Вениер, која има 216, додека Гут-Бехрами е трета со 164.
Во генералниот поредок, Шифрин има 1.209 бодови на првото место, Гут-Бехрами е втора со 869, а Петра Влхова е трета со 802.
Утре во италијанскиот ски-центар повторно се вози трка во спуст, додека во недела е закажана трката во супер велесалом.